Landhelgisgæslan hefndi tapsins fyrir 75 árum með dramatískum sigri í knattspyrnuleik liðanna.
9.12.2019 Kl: 10:09
Landhelgisgæslan bar sigurorð af konunglega breska flughernum í knattspyrnuleik um helgina. Vítaspyrnukeppni þurfti til að knýja fram úrslit. Staðan eftir venjulegan leiktíma var 3-3. Ásgeir Guðjónsson, sprengjusérfræðingur jafnaði metin með síðustu spyrnu venjulegs leiktíma og markvörðurinn Stefán Logi Magnússon tryggði sigurinn í vítaspyrnukeppni. 75 ár voru frá síðasta leik liðanna en þá fór breski flugherinn með sigur af hólmi.
Lið Landhelgisgæslunnar var skipað
starfsmönnum af flugrekstrarsviði, varnarmálasviði, aðgerðasviði, siglingasviði og
sprengjusveit. Þá fór Landhelgisgæslan mikinn á leikmannamarkaðnum fyrir
leikinn og var með öflug leynivopn í sínum röðum. Knattspyrnukempurnar Stefán
Logi Magnússon, Atli Jóhannsson, Björn Pálsson, Tryggvi Sveinn Bjarnason og
Ásgeir Þór Ingólfsson léku allir með liði Landhelgisgæslunnar.
Leikurinn var hnífjafn og spennandi.
Staðan eftir venjulegan leiktíma var eins á áður segir 3-3. Ásgeir Guðjónsson,
sprengjusérfræðingur, jafnaði metin fyrir Landhelgisgæsluna með síðustu spyrnu
leiksins en skömmu áður hafði Jóhann Eyfeld, sigmaður, minnkað muninn í 3-2. Ásgeir Þór Ingólfsson skoraði fyrsta mark Landhelgisgæslunnar.
Þá þurfti að grípa til
vítaspyrnukeppni þar sem Stefán Logi Magnússon, markvörður, reyndist hetjan.
Stefán varði eina spyrnu Bretanna og skoraði svo úr vítinu sem tryggði
Landhelgisgæslunni sigurinn.
Marvin Ingólfsson, fyrirliði Landhelgisgæslunnar, tók við NATO-bikarnum úr hendi Ellis Williams, yfirmanns bresku flugsveitarinnar, í leikslok.
Breski flugherinn hefur undanfarnar vikur sinnt loftrýmisgæslu hér á landi. Þessi bráðskemmtilegi leikur markaði lok hennar.
Leikurinn var sýndur beint á KeflavíkTV
Ljósmyndir: RAF
Liðin og dómarar fyrir leik.
Frosti Gunnarsson verst sóknarmanni breska flughersins.
Konunglegi breski flugherinn komst í 3-1 en Landhelgisgæslan jafnaði metin á síðustu stundu.
Úrslit leiksins réðust í vítaspyrnukeppni. Atli Jóhannsson skorar örugglega úr víti.
Jóhann Eyfeld, sigmaður, á vítapunktinum.
Stefán Logi ver víti frá liðsmanni breska flughersins.
Marvin Ingólfsson tekur við NATO-bikarnum.
Marvin og liðsfélagar hans fagna sigrinum.
Stefán Logi skoraði úr síðasta víti Landhelgisgæslunnar og tryggði sigurinn. 
Sigurinn var dramatískur. 
Marvin Ingólfsson, Jóhann Eyfeld og lið Landhelgisgæslunnar. 
Einar Hansen, varamarkvörður, gerði gæfumuninn á varamannabekknum og hélt uppi einstaklega góðri stemningu.
Georg Kr. Lárusson, Ellis Williams og lið Landhelgisgæslunnar. 
Sigurlið Breta árið 1944.
