Varðskipið Þór kom fyrst til hafnar í Vestmannaeyjum á þessum degi fyrir tíu árum.
26.10.2021 Kl: 10:18
Í dag eru tíu ár frá komu varðskipsins Þórs til landsins. Skipið
hafði fyrst viðkomu í Vestmannaeyjum þann 26. október árið 2011 að viðstöddu
fjölmenni. Það þótti vel við hæfi þar sem fyrsta varðskipið Þór, sem upphaflega
var keypt til björgunarstarfa við Vestmannaeyjar, varð upphafið að stofnun
Landhelgisgæslunnar árið 1926.
Þegar Sigurður Steinar Ketilsson, skipherra, sigldi Þór inn
í höfnina í Vestmannaeyjum átti það um sjö þúsund sjómílna siglingu að baki frá
Talchuano í Chile.
Koma varðskipsins Þórs markaði þáttaskil í leitar- og
björgunargetu Landhelgisgæslunnar og hefur áhöfn Þórs sinnt margvíslegum björgunarstörfum
á undanförnum áratug. Þá var skipið nýtt sem hreyfanleg aflstöð fyrir Dalvík
fyrir tæpum tveimur árum og sá stórum hluta bæjarins fyrir raforku. Við hönnun
skipsins var horft til þess að hægt væri að flytja rafmagn í land vegna rafmagnsleysis.
Þá hefur dráttargeta skipsins nýst vel á liðnum árum og
hefur skipið margoft komið að góðum notum þegar skip hafa orðið aflvana umhverfis
landið.
Fjölmenni var saman komið í Vestmannaeyjum þegar varðskipið lagðist þar að bryggju þann 26. október 2011.
Sigurður Steinar Ketilsson, skipherra, og Snorre Greil, stýrimaður.
TF-LIF, þyrla Landhelgisgæslunnar, fylgdi Þór inn til Vestmannaeyja.
Skotið úr fallbyssu, Þór til heiðurs.
