Stjórnstöð Landhelgisgæslunnar hefur sent út siglingaviðvaranir í vikunni vegna jakanna.
12.9.2024 Kl: 14:53
Varðstjórar í stjórnstöð Landhelgisgæslunnar hafa fengið fjölmargar
tilkynningar um borgarísjaka á Vestfjarðarmiðum og á Húnaflóa í vikunni. Siglingaviðvaranir
hafa verið sendar sjófarendum vegna ísjakanna.
Áhöfnin á sjómælingaskipinu Baldri sigldi framhjá sjö ísjökum á leið sinni frá Húnaflóa að Norðurfirði í gær. Jakarnir voru allt frá því að vera um
þrír metrar á hæð og breidd, upp í jaka sem var um 33 metra hár og um 110 metrar
á lengd. Staðsetning hans var í gær, 66°03,0´N 021°14,6´V og samkvæmt áhöfn Baldurs
virtist hann reka til austurs.
Landhelgisgæslan hvetur sjófarendur að sýna aðgát vegna jakanna
og tilkynna staðsetningu þeirra til stjórnstöðvar Landhelgisgæslunnar.
Meðfylgjandi er mynd af einum jakanum sem var úti fyrir
Reykjarfirði í gær.
Borgarís sem sást úti fyrir Vestfjörðum í gær.
Stór ísjaki var úti fyrir Reykjarfirði þegar áhöfn sjómælingaskipsins Baldurs var þar á ferð í gær.
