Mikill viðbúnaður vegna elds um borð í togskipi
Einn skipverji fluttur frá borði vegna gruns um reykeitrun
Stjórnstöð Landhelgisgæslunnar barst neyðarkall frá togskipinu Frosta ÞH229 klukkan 15:18 um að eldur væri laus í vélarrúmi skipsins. Varðstjórar í stjórnstöð Landhelgisgæslunnar kölluðu þá þegar út tvær þyrlur Landhelgisgæslunnar sem og varðskipið Tý, sem var statt í Ísafjarðardjúpi. Björgunarskip Slysavarnafélagsins Landsbjargar, Gunnar Friðriksson, var einnig beðið um að halda rakleiðis á vettvang auk skipa í grenndinni. Togskipið var þá statt um 45 sjómílur vest-norðvestur af Straumnesi. Tólf eru í áhöfn Frosta og kom fram að allir væru heilir á húfi en hugsanlegt að einn skipverji væri með reykeitrun. Stundarfjórðungi eftir að neyðarkallið barst frá Frosta barst stjórnstöðinni tilkynning um að búið væri að einangra eldinn í vélarrúminu en reykur væri um allt skip, nema í brú þess. TF-GNA, þyrla Landhelgisgæslunnar, hélt beint á staðinn og kom að Frosta um klukkan 17:25 og hífði einn skipverja frá borði. Hann var fluttur til Ísafjarðar vegna gruns um reykeitrun en þaðan var honum flogið með sjúkraflugvél Mýflugs. Hin þyrlan, TF-SYN, flaug vestur með fimm slökkviliðsmenn frá Slökkviliði höfuðborgarsvæðisins. Slökkviliðsmennirnir fóru um borð í Frosta um klukkan 18:00. Skömmu síðar kom varðskipið Týr á vettvang. Gott veður var á svæðinu. Togarinn Sirrý tók Frosta í tog fyrst um sinn en varðskipið Týr tók við drættinum laust eftir miðnætti. Frosti verður dreginn til Hafnarfjarðar.
Sigmaður Landhelgisgæslunnar sótti skipverja í Frosta vegna gruns um reykeitrun. Mynd: Áhöfnin á TF-GNA
Varðskipið Týr tók Frosta í tog og mun draga skipið til Hafnarfjarðar. Mynd : Guðmundur St. Valdimarsson.
Mikill viðbúnaður var vegna málsins. TF-SYN flutti fimm slökkviliðsmenn frá Slökkviliði höfuðborgarsvæðisins um borð í Frosta.
Frosti ÞH229. Mynd: Guðmundur St. Valdimarsson.
